NADOMAN NURUL HIKMAH, DARAS 30 (bagian 2)Tina Surat AN NAZIAAT (Malaikat anu Ngadudut Roh) - Surat Katujuhpuluh salapan - ayat 1 d/k 46

20 Dec 2004 - 12:33 pm

15. SAKARATNA JELEMA ANU KAPIR KACIDA PIKAWATIREUNANA (:79/1) - rhs, 17 Jumadilahir 1428 H


  • Sakaratna jalma kapir, estuning ku matak watir,
    ku Ijroil digebugan, anu kapir diteunggeulan.
  • Digebugan sahabekna, sangkan ka luar nyawana,
    nyawana mugen embungeun, sieun dika-narakakeun.
  • Si nyawa didudut tarik, nyawa teh ngajerit ceurik,
    tingkoceak sosongkolan, sakaratna nu teu iman.
  • Naha atuh maneh kapir, teu inget engke di ahir,
    bakal pinanggih jeung maot, dipapag malakal maot.
  • Sanajan ampun-ampunan, enggeus euweuh kasempetan,
    tobatna geus elat teuing, naha baheula teu eling.
  • Tarima bae buktina, sabab teu iman teu takwa,
    marukan teh bakal lana, langgeng rek hirup di dunya.
  • Na naon nu diteangan, ngumbar napsu tetemenan,
    terang-terang geus lekasan, malakalmaot nungguan.

16. MAOTNA JELEMA ANU MU'MIN MAH ESTU PASRAH PISAN (:79/2,3,4) - rhs, 17 Jumadilahir 1428 H

  • Ijroil diutus deui, nampi pancen ti Ilahi,
    pikeun nyabut deui nyawa, nyawana jalma nu takwa.
  • Ijroil nyanggakeun salam, panghormat ka mu'min Islam,
    sang nyawa teh digentraan, seug ka luar lalaunan.
  • Sang Nyawa lajeng dibetot, ditarik malakal maot,
    ditarikna lalaunan, teu pegat maca wiridan.
  • Ngageleser ngagulusur, lungsur-langsar narik umur,
    teu pisan karaos nyeri, pupus iklas rido ati.
  • Malaikat nu sanesna, lalebet ka salirana,
    nyabutan roh nu sanesna, tina sel-sel salirana.
  • Malaikat nu sanesna, jajap nyawa ka sawarga,
    nyawa nu iman nu takwa, pupusna bagja kacida.
  • Muga teuing diri urang, lamun engke kedah mulang,
    lamun geus cunduk waktuna, datang ajal geus mangsana.
  • Hoyong maot iman takwa, iklas ngaleupaskeun nyawa,
    maot nuju muslim mu'min, ngadeuheus Robul a'lamin.

17. SADAYA MALAIKAT PADA KAGUNGAN PANCEN TI ALLOH SWT (:79/5,6,7) - rhs, Jumadilahir 1428 H

  • Malaikat sadayana, pada kagungan tugasna,
    sadaya jadi utusan, kenging pancen ti Pangeran.
  • Ari tugas malaikat, ngajaga sareng ngarumat,
    ngatur sagebarna jagat, henteu aya nu kaliwat.
  • Bentang-bentang nu di langit, tingcarelak tingkaretip,
    panonpoe sareng bulan, sadaya tumut aturan.
  • Tapi dina hiji mangsa, ngadadak sajagat raya,
    ancur lebur pabalatak, dunya bencar paburantak.
  • Dunya sakitu wedelna, harita ancur sadaya,
    eta teh kiamat tea, bakal bukti hiji mangsa.

18. JELEMA ANU GEUS MARAOT BAKAL DIHIRUPKEUN DEUI DINA POE PANGADILAN (:79/8,9,10,11,12,13,14) - rhs, 17 Jumadilahir 1428 H

  • Dupi poe pangadilan, eta bakal dicirian,
    aya tangara soara, nu disebut sangkakala.
  • Sangkakala nu kadua, sorana tarik kacida,
    nu maot harudang deui, ka luar ti jero bumi.
  • Kabeh manusa degdegan, hatena teh gegebegan,
    pikir ketir sieun pisan, mikiran nasib sorangan.
  • Silih rangkul jeung baturna silih tanya jeung sobatna,
    euleuh geuning hirup deui, padahal geus maot lami.
  • Geus tangtu urang cilaka, da hirup pinuh ku dosa,
    rugi teuing diri urang, cilaka henteu kapalang.
  • Sakabeh umat careurik, rajeg di sagara keusik,
    narangtung luhur tegalan, nu legana tan wangenan.
  • Eta poe pangadilan, bakal nampi kaputusan,
    saha anu ka sawarga, jeung saha nu ka naraka.

19. NABI MUSA AS. DIPIWARANG NEPANGAN FIR'AON (:79/15,16,17,18,19,20) - rhs, Jumadilahir 1428 H

  • Kacarios Nabi Musa, harita linggih di Thuwa,
    munajat ka lenggah Gusti, kenging dawuh ti Ilahi.
  • Pidawuh Alloh Ta'ala, katampi ku Nabi Musa,
    yen kedah angkat ka Mesir, nepangan Fir'aon kapir.
  • Raja Fir'aon kamashur, kaasup raja nu kupur,
    galak gangas ngagalaksak, di dunya ngan nyieun ruksak.
  • Sugan mun ku Nabi Musa, Fir'aon robah adatna,
    tina kapir jadi takwa, nyembah ka Alloh Ta'ala.
  • Lajeng bae Nabi Musa, ngajugjug ka Mesir tea,
    maksadna bade nepangan, Fir'aon rek dielingan.
  • Mun Fir'aon daek eling, ku Musa bakal diaping,
    dituyun ka jalan iman, nyembah ka Alloh Nu Heman.
  • Malah Kangjeng Nabi Musa,ningalikeun muji'zatna,
    tapi Fir'aon mantangul,bedegong keukeuh ngabedul.

20. FIR'AON NGANGGAP DIRINA JADI PANGERAN (:79/21,22,23,24,25,26) - rhs, 18 Jumadilahir 1428 H

  • Dasar Fir'aon nu kapir, hese diajakan lilir,
    napsuna angger ngaberung, dasar kapir jalma linglung.
  • Malah jadi malik ngewa, miceuceub ka Nabi Musa,
    pajar sarapna kaganggu, ngaku-ngaku meunang wahyu.
  • Dikumpulkeun rahayatna, pok Fir'aon teh nyarita,
    pangeranna Nabi Musa, eta teh bohong kacida.
  • Pangeran mah nya kaula, nu disembah sanagara,
    Fir'aon anu ngawasa, kitu Fir'aon ngomongna.
  • Gusti Alloh lajeng bendu, ka mahluk nu model kitu,
    anu sombong gede hulu, bakal dila'nat geus tangtu.
  • Di dunya bakal dila'nat, komo engke di aherat,
    kisah Fir'aon baheula, pieunteungeun sarerea.

21. KAAGUNGANANA ALLOH SWT (:79/27,28,29,30,31,32,33) - rhs, 18 Jumadilahir 1428 H

  • Dangukeun ieu nadoman, sumangga geura lenyepan,
    kaagungan Gusti Alloh, estu hebat subhan-Alloh.
  • Kanggo Alloh mah teu sesah, nyipta manusa sakumna,
    kanggo Alloh mah teu sesah, nyiptakeun sajagat raya.
  • Alloh mah maha-keresa, teu langkung sakeresa-Na,
    dunya ngadadak ngagelar, bumi alam lega ngampar.
  • Geura sumangga tingali, geura titenan ti wengi,
    ngadadak poek meredong, leumpang oge rarang-rorong.
  • Tapi upama ti siang, panonpoe ngempray caang,
    sadaya ciptaan Gusti, dibeberes teu pahili.
  • Lajeng tina sela taneuh, ngadadak taneuh teh baseuh,
    malancer cai nyusuna, ngalocor walunganana.
  • Tina taneuh anu tadi, renung jujukutan jadi,
    hejo ngemploh pepelakan, karembangan baruahan.
  • Tuh tingali itu pasir, ngajajar pating jalegir,
    tuh tingali itu gunung, ngabedega jararangkung.
  • Sadaya ciptaan Alloh, hebatna teh subhan-Alloh,
    sadaya pikeun manusa, matak kudu iman takwa.

22. ARI GEUS DATANG KIAMAT KAKARA MANUSA TEH ARELING (:79/34,35,36,37,38,39) - rhs, 18 Jumadilahir 1428 H

  • Ras emut dinten kiamat, kajadian anu hebat,
    ancur lebur alam dunya, kitu deui jagat raya.
  • Kakara jelema eling, kiamat harita geuning,
    datangna ngadadak pisan, tinggaroak jejeritan.
  • Ras inget kana dosana, dosa nu dipilampahna,
    teu lila lawang dibuka, lawang asup ka naraka.
  • Naraka keur jalma kapir, anu hirupna mubadir,
    anu muja kana harta, sarua muja berhala.
  • Geuning ari kapir tea, rek saha bae jalmana,
    anu hirupna pidunya, eta teh kapir sipatna.
  • Tah jelema anu kitu, ka naraka enggeus tangtu,
    bakal jadi balad setan, di naraka pangancikan.

23. SAWARGA TEH PIKEUN JELEMA ANU IMAN TAKWA (:79/40,41) - rhs, 18 Jumadilahir 1428 H

  • Bagja temen jalma takwa, iman ka Alloh Ta'ala,
    anu teu kendat wiridan, nyebat asmaning Pangeran.
  • Bagja temen jalma mu'min, anu iman hakul yakin,
    nu mampuh ngajaga diri, hirupna boga kadali.
  • Mampuh ngadalian napsu, hirupna henteu kalangsu,
    napsu lahir napsu batin, kadalina takwa mu'min.
  • Jalma anu iman takwa, bakal lenggah di sawarga,
    dirahmat ku Nu Kawasa, bagja teuing ahli sorga.

24. IRAHA-IRAHANA KAJADIAN KIAMAT ANU UNINGA ANGING ALLOH SWT (:79/42,43,44,45) - rhs, 18 Jumadilahir 1428 H

  • Ayeuna oge sok aya, pirajeunan tunyu-tanya,
    kiamat iraha bukti, naha beurang naha wengi.
  • Mun aya nu nanya kitu, pek jawab anu saestu,
    kiamat iraha bukti, mung Alloh anu tingali.
  • Urang mah mung ukur mahluk, saukur tumut jeung tunduk,
    ngan ukur ngajadi saksi, kiamat datangna pasti.
  • Kawajiban diri urang, ibadah peuting jeung beurang,
    sumujud ka Gusti Alloh, miharep ridoning Alloh.
  • Urang mah ukur ngelingan, ngahudangkeun kasadaran,
    yen kiamat pasti bukti, kaalaman hiji wanci.

25. URANG HIRUP DI DUNYA TEH HENTEU LAMI (:79/46) - rhs, 18 Jumadilahir 1428 H

  • Dangukeun ieu sing hidmat, nami surat An-Naziaat,
    ayat opatpuluh genep, lenyepan mangka saregep.
  • Nalika kiamat datang, duka ti peuting ti beurang,
    manusa kakara sadar, yen hirup mubah kalantar.
  • Hanjakal kakara eling, waktuna geus elat teuing,
    enggeus beakeun waktuna, nutup lawang pangampura.
  • Katambah waktu harita, karasa ku sarerea,
    di dunya asa can lila, kakara sakedet netra.
  • Hirup teh asa can lami, asa kakara kamari,
    malah asa karek tadi, kitu rarasaan jalmi.
  • Terang-terang enggeus ahir, dunya eureun henteu muntir,
    ancur lebur jagat raya, kiamat teh nya harita.


TAMAT - NADOMAN NURUL HIKMAH, Tina Surat AN-NAZIAAT